En Familia é un programa de acollemento familiar que promove a creación dunha rede de familias que se constitúan en referentes sólidos e estables para nenas, nenos e adolescentes que non dispoñen doutras alternativas familiares.

O programa nace en 2020 impulsado pola Fundación Faiben, a Casa de Familia Santa Joaquina de Vedruna, a Casa de Familia Laura Vicuña e Manaia Asociación Galega de Adopción e Acollemento e pretende ofrecer solucións familiares que eviten no posible estancias de longa duración nos recursos residenciais.

Conta co apoio e financiamento da Consellería de Política Social e Xuventude da Xunta de Galicia a través dos fondos NextGeneration da Unión Europea.

Ser familia de referencia significa estar presentes para as nenas, nenos ou adolescentes e enfocados no seu benestar. Poñelos no centro e, de forma consciente, garantir o seu dereito ao afecto.

A través dunha convivencia familiar progresiva e adaptada ás necesidades específicas de cada nena ou neno, as familias constitúense en figuras imprescindibles para favorecer o seu adecuado desenvolvemento afectivo, ampliar a súa rede social e contribuír na reparación do seu dano.

Requisitos para participar:

• Voluntariedade.
• Estabilidade emocional, familiar e afectiva.
• Non estar nas listas de adopción.
• Estabilidade económica e unha vivenda axeitada.

Apoios cos que contan as familias:

• Un servizo de acompañamento especializado e individualizado, para apoiar a súa labor, responder a consultas e ofrecer orientacións ante as dificultades que puideran xurdir.
• Unha rede de familias, que contarán cun espazo de apoio, soporte e cohesión grupal.
• Unha formación continuada e o acceso a recursos específicos.
• Unha compensación económica establecida pola Xunta de Galicia.

O programa vai dirixido a nenas, nenos e adolescentes en desamparo ou en risco de desprotección que non contan con alternativas familiares estables nin adecuadas.

Estas rapazas e rapaces residen actualmente en centros de protección nos que atopan un espazo de seguridade que lles garante a adecuada cobertura das súas necesidades básicas convivindo con outras nenas e nenos e co equipo educativo nun contexto de protección e afectividade.

Con todo, e a pesar destes apoios, estas nenas e nenos precisan crecer nunha familia onde vivir experiencias de relación que lles permitan construír a súa identidade e desenvolverse en plenitude sentíndose queridas, respectadas e protexidas.

As familias seguen un itinerario formativo ca intención de profundar no coñecemento do acollemento familiar e das necesidades das nenas, nenos e adolescentes destinatarios.

Cales son as fases do proceso?

1. Información.
2. Formación (16 horas).
3. Ofrecemento para participar no programa.
4. Valoración e estudo de expectativas.
5. Banco de familias.